Tag 44: Sunntigsbache

De hötig Sunntig hei de Werner und ig zäme i dr Chuchi verbrocht. Ig ha höt quasi e exklusivi 1:1-Betröig gha. Zäme hei mer am Werner sini absoluti Lieblingstorte gmacht und hei die natürlich mitemne Kafi zäme probiert. Das isch ou scho Tag 44 gse.

Tag 43: Es paar Fakte zum hütige Tag

Dr Markt isch hüt weder ned grad guet glüffe. Z Wätter isch grad mou fürne Stung troche gse - de Räscht hets i Ströme grägnet. Ig ha am Ändi afe d Cake im Wärt vom meh aus 200.- Dollar de Hüehner verfueret.
Es isch eigentlech verbote, d Waar, wo scho am Markt gsi isch, weder i d Gfrüri z tue. Mir maches trotzdäm: Igfrüre, wieder uftoue - und meischtens no grad es drittes Mou.
Z Wasser us dr Duschibruse stinkt brutau nach Gülle… und Trinkwasser hei mer für di nöchschte paar Täg keis meh.
Für Hirsche, Reh, Elche oder Bäre z schiesse bruchsch eigentlech e Lizänz. Mi Gaschtvater schiesst aues – aber ohni Lizänz.

Tag 42: Weder kei Markt

E witere ganze Tag isch mit Bache verbii gange – u grad druf e witere Tag amne Markt, wo weder absolut ned glüffe isch. Zudäm simer no die einzige Verchöifer gse, wöu dr Markt geschter Obe isch ufgrund vom Unwätter abgseit worde.

Trotz auem hani aber glich höt 13 verschiedeni Chrömi gmacht. Und ig bi mer ou sicher, dassi jetzt de öppe e Bachpouse bruche.

Tag 41: No 6 Fäuder

Höt ha nig chönne z Fäud mouchere mit em Traktor – öppis, wo mer auso würklech Spass gmacht het. Ig ha ou nume einisch chli z vöu Zuun verwütscht. Jetz hani no 6 Fäuder vor mer, die ig einisch so näbe dr Arbeitszyt muess mache - so isch dr Deal. D Gaschtmuetter brucht me nämlich am Herd…

Tag 40: Vo aune Site si Schof cho

D Lune vor Gaschtmuetter uszhaute isch würklech e schwierige Job. Drum loufi jetzt mit mine Fuetterchesseli ou lieber drü Mou, statt aui uf einisch z nä. Höt hei mer no aui Schöfli heighout, wöu die i de nöchschte Täg e Hufpfleg bruche. Insgsamt si auso fasch 200 Schof zämecho.

Tag 39: Ranchtag

De höttig Tag het sech einisch nach Ranchläbe agfüeut: Zuunet, Gras gmäit, nomou Zuunet und zum Abschluss mit de Ros de Zün nochegritte. Das wär ou scho Tag 39 gse.

Good to know

Outofahre mit 14ni: Z Kanada cha me d’Outoprüefig scho mit 14ni mache. Me muess de aber immer öpper mitere göutige Fahrbewilligung näbe sich ha. Mit 16ni cha me de allei fahre.
Fasch aui Läde hei am Sunntig offe: Meischtens si si vom 8i am Morge bis 8i am Obe offe.
Heu wird dusse glageret: Die meischte Farmer lagere ihres Heu eifach dusse ufem Fäud, ohni Blache oder öppis drüber, wöu d’Summere i Kanada normalerwiis rächt troche si – eifach nid dä Summer.
Ferie: Die meischte Agstöute hei hie nume zwöi Wuche bezauti Ferie pro Johr.
Dokterbsuech ufem Land: We me wit usse wohnt, so gseht me de Doktor meischtens per Laptop, statt persönlich id Praxis z fahre.

Tag 38: E witere Shopping-Day

Höt isch weder Mäntig – auso heisst das: Shopping-Day. De Werner und ig si weder zäme go shoppe, was ig ou sehr gärn mache. Hüt hani d Müglichkeit gha, mit ere kanadische Familie mit vier Ching z rede. Scho am Morge si üs uf de Stross vieli Pick-up-Trucks ufgfaue, hinge dra aghänkt hei die nämlich Wohnwäge gha und ä dam no e Rosstrailer. Ufem Parkplatz vorem Ichoufszentrum hani de so e Familie agsproche und si hei mer verzöut, dass d Ching hie vom Juni bis Ändi September Ferie hei. Vieli Familie nutze die langi Summerferie für e grössere Trip quer dür Kanada.

I de Läde faut mer immer weder z gliche uf: Z Wasser isch im Verglich zude Süessgetränk vöu türer. Es süesses Getränkt z choufe macht auso scho wägem Pris meh Sinn aus zure Fläsche Wasser z grife. Ou d Frücht, z Gmües, de Chäs und d Schoggi si sehr tür. Ganz angersch isches mit Burgers, Pommes, Glace, Doughnuts, Cookies, Gipfeli, Hotdogs und ähnlechs cha me in riesige Mängine und vor auem sehr günschtig choufe. Zum Verglich: E Glacechübu mit 11,4 Liter Inhalt git's scho für rund 10 Dollar. Die chlinschti Packig Pommes Frites, woni hüt gfunge ha, het 5kg Inhaut gha. Hingäge hei 500g Brombeeri über 12 Dollar koschtet. Und mer rede do vomne normale Lade - nid vomne Grosshändler.

Zum Abschluss vom Tag simer de no ufne Schwizer Metzger troffe...

Tag 37: Weder e Tag mit Pommes und Burger

Hüt het dr Werner Geburtstag gha, drum hei mer ersch e Stung spöter agfange. Vöu meh aus Burger und Pommes ässe hei mer de ganz Tag zwar ned gmacht, aber über d Zuekunft vom Wernern und dr Barb hei mer intensiv gredet: D Autersvorsorgig hie z Kanada isch ned grad so guet und d Barb sehnt sech zrugg z'go id Schwiz, während de Werner jetzt genau 26 Johr z Kanada läbt und ou do blibe wird.

Wenn me so wiit usse wohnt wie mir, wird scho eifach aues komplizierter. Gschwing zum Doktor fahre oder e Zahnpaschta go hole, chame nämlich ned. Da jetzt z Gäud knapp isch, wird für die nöchschti Zyt ou afe mou kei Kafi me nochekouft.

Tag 36: Chaut und nass

S Wätter isch leider immer no schlächt: Grad mou 9 Grad, richtig chaut, und de ganz Tag hets grägnet. Wenigschtens hei mer hie z Alberta kei Schnee gha – angersch aus z Calgary, wo's tatsächlich gschneit het höt.

Wies ou fasch ned het chönne angersch si, isch ou dr Seba Märit ned glüffe. Es het fasch keini Bsuecher gha, vieli Verchöifer si gar ned erschine. Bis mer üsi War usglade hei, isch die de ou scho nass gse und derzue het's Zäut no Schade gno vom Wind. Kurz gseit: Dä Schuss isch ou höt weder hinger use.

Mer hei auso die ganzi War weder iglade und si 1,5h heigfahre. Für söttigi Verchöifer wie mer, wo auso uf d Inahme vo dene zwöi Täg ir Wuche agwiese si, isch so öppis natürlich scho schlimm. Schlussändlich hei mer üs no quer düreprobiert vom Bachnige und hei glich no e gmüetliche Obe gha.

Tag 35: 21 Stung Arbeit für 2 Brot und es paar Cakes

De Tag het weder am 5i am Morge agfange mit Bache. Dr Werner isch die Nacht usgfaue, da är chrank isch und mer si du när ziemlich i Verzug cho mit Bache. Mir hei üs aber aui Müeh gä, damit mer bis 13:00h fertig si, da am Fritig nämlich dr Märit z Wildwood stattfingt. Mit drü Outo si mer de ungerwägs gse für zum Märit, wöu mer ned noche hei möge und nach und nach d Produkt ufe Märit brocht hei.

Dr Ufbou am Märit isch wie z Bache und z Verpacke (mit Labels drucke, i Chüeler ilade, etc.) sehr ufwändig. Und da z Wätter immer no schlächt isch, hei mer nach däm ganze Ufwand genau zwöi Brot und es paar Cakes verchouft. Mir hei auso nid emou annährend d Benzinchöschte wieder ineghout.

Mini Gaschtmuetter het normalerwis no zwöi witeri Mitarbeiterinne während dr Wuche. Hüt het sie dene aber müesse absäge, wöu kes Gäud ine cho isch. Und wenn z Wätter morn wieder schlächt isch, de isch d Chance gross, dass dr Märit z Seba ou ned vöu besser louft. Am 9ni am Obe si mer de afe heicho und ig hätt no söue de Schöfli nocheseckle und de Abwasch mache, was ig aber ned gmacht ha - ig hami nämlich säuber i Fürobe entlo.

Tag 34: Kei Überraschig

Hüt Morge isch e Inspäktor zu üs hei id Chuchi cho. Es isch drum gange z prüefe, ob mir üser Produkt ou offiziell aus kommerziells Produkt chönnte verchoufe und i Läde bringe.

Wo mir ghört hei, dass d’Kontroue vor dr Tür steit, hei mir no schnäu aues müesse uf Vordermann bringe: D’Chuchi hei mer putzt, d’Schöibe und Hoornetzli agleit, Wärbeplakat ufgstöut – eifach aues, was me so macht, wenn Bsuech chunnt. Das het aber aues nüt gnützt, wöu mer si ber Kontroue nid dürecho.

Das isch auso ou scho dr Tag 34 gse.

Tag 33: E verrägnete Tag

Dr Tag höt het agfange mit Spitzbuebe mache. Leider macht üs z Wätter aber e Strich dür d Rächnig. Wäge de viele Gwitter, Stürm und em Räge isch d Produktion vorlöifig igstöut worde. Wenns nämlich so rägnet, chöme d Lüt nid a Markt, und mer verchoufe zersch emou aui Produkt usem Chüeler, bevor mer wieder nöii mache. Leider betrifft das Wätter nid nume üsi Spitzbuebe-Produktion. D Auktion, wo fürs Wuchenänd plant gsi isch, isch abgseit worde, und ou s Rodeo z Calgary fingt nid statt.

Am Nomi isch de no dr Hufschmied cho. Vorhär ha ig aber fasch e Stung lang im Räge müesse Ross sueche, bis ig die gfunge ha. D Ross hei nämlich 63 Hektare Land zur Verfüegig.

Zum Abschluss vom Tag si mer no is Nochberdorf go Bingo spile. Das isch aber de e eigenti Klicke für sech gse dört … do het jede und jedi sis Göferli mit Farbstifte und Marker derbi gha. Mer heis aber luschtig gha.

Good to know

Wildwood isch gföut mit Dütsche: Wildwood isch es chlins Dörfli mit öppe 250 Iwohner. D Mehrzau dervo si Dütschi.
Z Strossesystem: Die meischte Strosse si schnäui Verbindige mit Tempolimit vo 110 km/h. Velofahrer dörfe die Strosse ou benütze. Die Strosse darf me ou eifach überquere (ou vom Gägeverkehr us), me muess eifach schnäu si.
Dr Winter hie: Dr Winter cha sehr chaut wärde. Temperaturä vo -40/-50 °C si kei Säuteheit.
D Lüt hie - näs ömu ned z sträng: Kanadier si im Allgemeine sehr fründlech, gmüetlich und gsprächig. Im Lade oder uf dr Stross ghörts dezue, öpper mit emne «How are you?» z begrüesse. Us mire Sicht si vöu Lüt hie zfride und positiv iigstöut – öppis, wo mer üs i dr Schwiz mängisch chönnte zum Vorböud näh.

Tag 32: E ganz normale Tag

Bache, putze und Tier fuere - das wär ou scho Tag 32 gse.

Tag 31: E Tag i dr West Edmonton Mall

Geschter ischs für me am 7ni losgange – richtig West Edmonton Mall North, eis vo de gröschte Shoppingzänter überhoupt. Dr Werner und ig hei uf em Wäg no vöu Uslieferige gmacht und vor auem Schofwurscht verteilt.

Vom 10ni bis am 3i ha nig de Zyt gha, um i dr Mall z Edmonton go izchoufe. Und das isch würklech enorm gross gsi! Es het dört aues gha: Es Kino, e Isloufbahn, e riesigi Wasserwäut, Zahnarzt, Coiffeur und no vöu meh. Eis Stockwärk isch vou gse mit Restaurants, wo ni mer de ou chli öppis gönnt ha: Waffle, Glace und Falafel.

Am Nomi het me de dr Werner wieder abghout, und mir si no i witeri verschiedeni Läde. Dr gröschti Ungerschid zu üs ir Schwiz isch, dass Läde wie Walmart oder Superstore praktisch aues unger eim Dach hei. Vo Hüehnerfuetter über Backware und Textilie bis zu Garteartiku – aues gits i eim riesige Lade. I dr Schwiz fäut üs natürlich ou dr Platz, um so öppis z boue. Im ne Art Grosshanduslade si mir de no 200 Kilo Mäu go hole. Am 9ni am Obe si mer wieder deheim gse und ig ha es super idrückliche Tag gha.

Tag 30: Schöfli trenne

Wüu mer geschter nachem Rodeo no a die aschliessendi Party si gange, isch d Nacht entsprächend churz gse. Aber am Sunntig isch immer dr Putztag, drum hei mer die Chuchi weder uf Vordermann brocht. Mer hei de när no Schof separiert, da d Lämmli vode Müettere hei müesse trennt- sowie uf Wibli und Böckli ufteilt wärde. Wöu aber aui Züün nume so haubprovisorisch zämebaschtlet si, het die Aktion de ganz Nomi und Obe duret. Es paar Schof si abghoue, d Lämmli hei wieder dr Wäg zrugg zu de Müettere gfunge, när si d Böckli wieder bi de Wibli gse und die 108 Hüehner si ou no abghoue. Und jetzt woni ändlech wett schlofe tönts vo aune Sitene nur no: Määä, määä, määä...

Tag 29: Markt und Rodeo

Hüt Morge ischs für üs scho früeh losgange. Mir hei aui verpackte Sache is Outo glade. Bsungers bi de Chüehler hets no e riese Gschicht gä, wöu die müesse während em ganze Transport ganz gnau uf dr richtige Temperatur blibe. Mini Gaschtöutere hei sech für de Markt ou useputzt. Uf em Markt wird punkt 10:00h s Horni glütet, und erscht ab denn darf verchouft wärde.

Am Seba Beach hets vöu Lüt, wo dört Ferie mache oder es Feriehüsli hei. Drum isch das dr perfekti Ort, um früsches Brot oder Bachware cho z hole. U glüffe ischs würklech wie verruckt: Mir hei zitwis e Schlange gha, wo vo üsem Stang bis ad Stross gange isch.

S Highlight vo dr ganze Wuche isch de am Nomi cho: Z Rodeo. Agfange het aues mit em Bronc Riding, auso de bokende Ross. Jede Cowboy bechunt es Ross zueglost. Die Bronks wärde us Calgary mit grosse Laschtwäge aagfahre. S jüngschte Ross isch 6-jährig gsi, s öutischte sogar 20-jährig. Die Ross reise vo Rodeo zu Rodeo und verbringe dr Räscht vo dr Zyt uf dr Weid. Nach jedem Isatz het es Ross zwöi Wuche Pouse, bevor es wider a nes Rodeo geit.

Ou d Cowboys si praktisch ständig ungerwägs. Si zieh vo Alass zu Alass, genau wie d Ross. Die ganz erfougriche Cowboy chöi derby bis zu 500'000 Dollar im Johr verdiene. Nach em Bronc Riding hei no verschiedeni Diszipline stattgfunge, unger angerem ou mit Chäubli. Natürlich hani ou Sache gseh, wo ned grad schön se gse. Es isch ou meh aus ei Cowboy useghumplet, und es paar hets ou ad Gitter ufedrückt… sisch aber sehr e idrückliche Tag gse, womer sicher in Erinnerig blibt.

Tag 28: Das Ganze isch de glich no gross...

Hüt Morge ischs scho am 7ni losgange mit Bache und mer hei bis spät am Obe düregschaffet. Mini Gaschtmuetter isch sogar scho am 2i ir Nacht ufgschtange zum Brot bache. Für mi het das praktisch gheisse: Kei Schlof meh, wöu ig jo quasi ir Bachstube schlofe…

Am 7ni hei mer de när richtig losgleit. Uf em Programm si Pizza, Pizzaschnägge, e ganzi Mängi Pfannchüeche und natürlich Zimtschnägge gstange. Als Bäcker sött me natürlech immer chli vo auem probiere – und genau das isch ou chli z Problem gse. De ganz Tag ha ig Zimtschnägge i Ofe gschobe, usegnoh und hät immer weder chli söue luege ob si guet si. Uf jede Fau ischs mer bis jetzt no schlächt - und ig ha gnue Zimtschnägge gha für die nöchscht Wuchene.

Bsungers beliebt si d Pfannchüeche vo dr Barb. Sie macht 15 verschiedeni Sorte. Je nach Gschmack wird jedi Sorte angers verziert.

Good to know

Hüng si Arbeitstier: E Hung het me hie nid aus Hustier. Är isch vor auem derfür do, dr Hof z bewache, und läbt drum dusse.
Chüngle für d Gfrüri: Mi Gaschtvater het 8 jungi Chüngle. Die wärde grosszoge, damit si spöter id Gfrüri chöme. Höi isch z tür zum Choufe und lohnt sich ou ned, zum Produziere. Drum gits nur Gras für die.
Gwüssi Läbensmittu si sehr tür: Fleisch, Schoggi, Chäs und ou Gmües choschte vöu meh aus ig erwartet ha. Fertigs Ässe isch günstiger - drum choche die meischte Lüt ou ned und choufe sech Pasta oder e Burger für 2 Dollar.
Pepsi statt Wasser: Im Supermarkt isch Wasser türer aus Pepsi. Das erklärt ou weder, werum Süessgetränk bevorzugt wärde. Und derzue chunt no: Trinkwasser abem Wasserhane isch ned säubschtverständlich.

Tag 27: Bache, bache, bache

Dr Tag het hüt weder am 8i am Morge agfange mit Mandle röschte. Das hani de für di nöchschte füf Stung gmacht. Nachhär isch es wiitergange mit Zimtschnägge, Chrömli verziere und Rüeblichueche bache.

Z Läbe hie isch haut eifach angersch. Me het nid die Mittu, wo mer z Europa hei, und vöu Lüt wo hie näbeusse wohne, läbe sehr eifach. Vöu hei nid emou jede Monet es sichers Ikomme. Das isch nämlich ou grad de Grund werum mer jetzt im Vorus so vöu produziere - und zwar für die Zyte, wos kes Gäud git.

Dr nöchscht Nochber wohnt öppe 6 Kilometer entfärnt. Was mi beeindruckt: Hie hüuft me enang. Mi Gaschtvater bringt ere Familie regumässig Houz, und d Nochbere säie defür üsi Fäuder ah mitem Traktor. So funktioniert d Gmeinschaft hie.

Es git ou Sache, woni mi no nid cha gwöhne. D Katze wärde hie mit em Mässer kastriert, und wenn me e Hirsch gseht, wird dä gschosse und vo Hand zerleit.

Tag 26: Brot, Turte und meh

Hüt isch Brot bache dranne gsi – und ganz vöu Spitzbuebe sowie angeri Chrömli. Gässe und probiert wird natürlech ou immer vöu vom Säubergmachte. Zum Zmorge gits meischtens Bräzu, am Mittag Wurtschweggli, zum z'Vieri ghört es Kafi mitere Turte derzue und am Obe gits eigets Lamm – und natürlech nomou Turte. Verhäutnismässig issi auso wiene Fürschtin, zmingscht wenn me d Umständ aaluegt.

Sobauds ums Bache geit, änderet sech d Istellig vo beide Gaschtöutere sofort. Zum Glück wird aues no es bizli gnauer und hygienischer - do bini schono froh. Hinger jedem Produkt steckt nämlich vöu Ufwand und Arbeit.

Ou höt hets no fürne Usritt glängt. Mer si zwar ines Gwitter cho, heis aber dä Obe no gmüetlich chönne abschliesse: Hei Znacht- und es Fürli gmacht und Jazzy gspöut. Und wöu no es jungs Schöfli uf em Hof isch, wo im Momänt nid ganz zwäg isch, het das ou no e Sonderbehandlig übercho. Das hei mer nämlich bi däm Sturm ou grad mit inegno - respektiv id Stube.

Tag 25: Besseri Ussichte

Dr normau Tag fot hie am 8:00 ah. De wird zersch mou Zmorge gmacht, und gäge 9:30 lege mer när los. I ha mi Rhythmus mittlerwile ou schochli gfunge. Für id Chuchi legi jetzt vom Zimmer diräkt d Schueh ah … und ig ha mi langsam ou a das "eifache Läbe" gwöhnt. Weme das hie nämlich ned säuber erläbt, chame sech das äue gar ned richtig vorstöue. Und höt Morge hets ou e gueti Nachricht gä: Mer hei weder warm Wasser.

Mir hei när de Tag mit Bache verbrocht: Wurtschweggli, Cookies und no meh Wäihechüeche. Cho häufe isch üs d Ashley – e Iheimischi mit vier Ching, wo die deheim ungerrichtet und jede Mittwuch bi üs ushöuft. Das isch de scho öppis angers gsi, mou mitere Kanadierin chönne z rede.

Mir hei bis spät am Obe bachet. När si mer mit em Traktor go d Ross sueche. Die si nämlich irgendwo uf dene 64 Hektare rund ums Hus verteilt. Es het fasch e Stund brucht, bis mer se gfunge hei. När hei mer d Ross gsattlet und si ds ganze Areau go erkunde.

Die Wiiti hie isch würklech öppis Bsunders. Stundelang geits eifach gradus, wit und breit isch eifach Waud und ab und zue chunt de weder e Nochber. Mit chli Glück gsehsch e Kayote, ä Elch oder e Hirsch – süsch fasch nüt. Gäge 23:00 si mer vo däm Usritt heicho, und 24:00h de afe im Bett gse. Das Gspräch woni mit de Gaschtöuter gfüehrt ha, het uf jede Fau vöu glettet - villecht wändet sech das Ganze de doch no zum Guete.

Tag 24: Z Dürenang isch glöst

Dass ig nid uf dere Ranch bi glandet, wo mer versproche worde isch, isch jo mittlerwile ganz klar. Drum bi ig mit mine Gaschtöutere zämeghockt, und mir hei zäme gredt – und zwar uf Bärndütsch.

So wie sech das usegstöut het, si si nid elei tschoud am Verbreite vo Fauschinformatione. Ou d Organisation säuber isch es Problem. Die hei nämlich ou z grosse Gäud gmacht, während d Familie praktisch nüt a mer verdient. Mir hei drum beschlosse, s Beschte drus z mache und eifach nöi azffoh:

D Barb het i dr Schwiiz Bäckere glernt und dört dr Werner kenneglehrt, wo Konditor isch. Zäme si si nach Kanada usgwanderet und si hüt z Wildwood dehei. Si hei 64 Hektare Land, 118 Schof mit Lämmli, wo si für Fleisch und Wule bruche, Hüehner, wo rund 108 Eier pro Tag lege, drü Hüng, sächs Chatze, es paar Chüngle und vier Ross. D Barb het hie z Kanada mit em Bache vo schwizerischem Brot agfange, wo si am Afang eifach verschänkt het. Wöu das bi aune so guet acho isch, het si immer meh bache und bietet hüt es riesigs Sortimänt a Backware a. Das isch mittlerwile ihre wichtigscht Verdienst.

Nachere wiitere grosse Putzaktion i däm ganze Huus isch de höt überraschend ä gueti Chuchi zum Vorschin cho. Dr Räscht vom Tag hei mir Cherry Pie gmacht – e Art Wähe, wo hie sehr beliebt isch.

Tag 23: Rustikal isch no ungertribe

Jooo, s isch ziemlich rustikal hie. Dr Tag hüt het agfange mit Chuchi putze. I ha die Glägeheit de ou grad gnutzt und ha mis Zimmer gsugt. Wo dr Werner Riis kochet het – mit Brot und Hundefuetter drin – im Chochtopf, wo mer ou scho geschter Obe zum Znacht brucht hei, hets mi scho s erschte Mou glüpft.

Gäge spötere Nomi hei dr Wauter und i ghouzet – und das amene Sunntig. Nachhär hei mer no d Schof useglo, und i ha d Hüehner kenneglernt. Wo är mir gseit het, dassi uf aune Vierne e Gang im Dräck hingere muess schnoge, um go Eier z reiche, hets mi grad wider glüpft.

Und wo mer d Hüehner-Näschter si go usmischte und är gseit het, dass ärs vo Hand macht, hani de definitiv gseit, dass i gwöhnt bi mit Schufle z schaffe. I bruche äuä no chli Gwöhnigszyt.

Tag 22: D Reis nach Wildwood

Für me isch hüt losgange vo Burnaby zum Flughafe Vancouver und vo dört us zum Flughafe Edmonton. Mini Gaschtmuetter isch me de cho abhole, und mer si no 2,5 Stung heigfahre. Woni is Outo igstige bi, hani mer zersch nume dänkt, dass es dräckigs Outo jo no lang nüt muess heisse. Woni aber erfahre ha, dass d Barb – mini Gaschtmuetter – e Schwizerin isch, dr Gaschtvater Werner us Dütschland chunnt und d Laura, wo ou im Hus wohnt, ou e Dütschi isch, hani scho z erschte Mou d Nase grümpft.

Womer Deheim si acho, hani dänkt ig troue mine Ouge ned. Mer si is Hus inecho, wo gliichzytig Bachstube, Wohnhus u Chuchi isch. Nachhär bini i mis Zimmer cho, u dört het mi de Schlag definitiv troffe: I ha sogar es Voguchefig i mim Zimmer. D Barb het mer de spöter ou gseit, dass ihres Profil nüm ganz eso stimmt. D Fotos, wo si ufglade hei, hei si brucht, wüu si dennzumau e Föum träit hei. Tatsächlich chunnt mer das Ganze ou es bitzeli vor wie imene Föum – nume het dr Typ, won i im Chopf ha, warms Wasser gha zum Dusche.

Tag 21: Dr letschti Tag z Vancouver

Dä Tag het wie immer mit dr Schueu agfange. Ig ha aune tschüss gseit und zum Abschied si mir am Mittag no zäme go Pesto ässe, hei es bitzli gschoppet und när hani mi ou scho mit mine Roommates troffe. Die hei nämlech no öppis Speziells mit mir wöue ungernäh. Mir si auso i d Art Gallery gange – s gröschte Museum z Vancouver. Für das si mer fasch 2h agstange, heis du när aber öppe i 40 Minute gseh gha…

Es bsungers härzigs Erlebnis hani de no gha, woni are Buschauffeuse tschüss gseit ha. I dene drü Wuche bini nämlich immer wieder uf die glichi Chauffeuse troffe - meischtens denn, wenni versehentlich die fausch Buslinie gno ha. Si isch scho e öuteri Dame gsi, und het jedes mou glachet und gseit: «Girl, you are wrong – again». Si het mir nämlich när immer witerghoufe und wenni de ändlich dr richtig Bus gno ha, het si e chlini Party gmacht, wöuis gschafft ha. Zum Abschied hani ihre e Militärschoggi gschänkt und si het grad afo gränne – das isch würklech no sehr härzig gsi.

Und scho isch dr letschti Tag verbi gsi. Die drü Wuche z Vancouver si ungloublich schnäu verbi gange. Vancouver isch würklech e mega cooli Stadt, wo mer sicher no lang i Erinnerig blibt. Z Fast Food und dr SkyTrain wirdi aber sicher ned vermisse ….

Tag 20: Z letschte Kafi

Höt ischs so wit gse: Mer hei nach der Schueu nomou z letschte Kafi zäme gno und hei üs no grad es Dessärli gönnt.

Tag 19: Die riichi Schwitzerin

D Inderinne, Chinesinne und ou d Koreaner säge mer fasch täglich dr glich Satz: «You are a lucky girl!»

Wenn ig säge, dass ig us dr Schwiz chume, reagiere nämlich aui glich: «Wow, du heschs guet. Du wohnsch im ne schöne Land, d Regierig funktioniert, du hesch keini Problem und dir geit's guet.»

Für vöu Lüt hie isch d'Schwiiz gliichbedütend mit Wohlstand und emene sorgelose Läbe. Aber we me die Reaktione vo aune immer wieder ghört, fahrt eim das scho chli ii.

Us de Erzählige vo de Koreaner und Chinese gspürt me dr Druck, wo i dene Länder herrscht. Es geit immer ums Studium, d Karriere und gueti Note. Fasch aui vo mire Klass hei scho aus chliini Ching bis zu füf Instrumänt gspöut, wöu wär meh cha, dä isch besser. Derzue chunnt no die schlächti Luftqualität i vielne Grossstädt, und vöu Entscheidige triffsch bis hüt nid säuber. Do bini hüt weder einisch meh dankbar gsi, dass ig us dr Schwiiz chume – und dusche mit dene wetti ou nid.

Tag 18: Granville Island

Nach dr Schueu hüt hei mer dr Bus gno zum Granville Island Markt. Das isch e ziemlech grosse Markt mit ganz vöu verschiedene Stäng. Vo Gmües über Frücht bis zu Fisch und ganz vöu Food-Stäng hets aues gha. Natürlich hei mer üs dört ou chli düreprobiert. Dr Fisch und z Fleisch hei mer aber usgloh. D Gschmäcker dört inne si ziemlich intensiv gse …

Tag 17: UBC Rose Garden

Nach dr Schueu hei mer höt no e Abstächer i UBC Rose Garden gmacht. Vo dört us hei mer wieder einisch meh e wunderschöne Usblick ufe Pazifik gha - öppis wo eim immer weder Idruck macht. So nöch am Pazifische Ozean z loufe isch scho öppis bsunderigs. Vore Wuche isch genau a däm Ort e Wau gsichtet worde. Drum hei mer natürlich ghoft, mit chli Glück villecht ou einze z gse. Mer hei aber keis Glück gha und kei Wau gse…

Tag 16: Deep Cove

Dr hütig Tag het weder 8:00h agfange – und zwar bim berühmtischte Doughnut-Lade vo Vancouver. Normalerwiis wartisch dört bis zu zwöi Stung, aber mir hei Glück gha und si scho nach rund 30 Minute bedient worde. Ungerwägs bi nig mit zwöi Koreanerinne gse - die hei ganz e stränge Zitplan gha, mer hei defür ou chli öppis gha vom Tag …

Nachhär si mir zum Deep Cove glüffe, das isch es Küstedörfli am östlichschte Rand vo Nord Vancouver. Dört hei mir z Mittag gässe und d wunderschöni Ussicht uf d Bucht gha.

Nach em Ässe isch es scho wieder zrugg gange, direkt i de nöchschte Bus zum Lynn Canyon Park. Dört hei mir e längeri Wanderig gmacht. Zwüsche dene riese Böim und em grüene Waud hets sech das scho fasch agfüeut wie imne Dschungel. Natürlich hei mer dört ou die berühmti Hängebrügg - d Lynn Canyon - bsuecht. Und zum Abschluss si mer no go Glace ässe. Sisch weder e super Tag gse.

Tag 15: The Grouse Grind

Der hütig Tag het scho am 8:00h agfange. Mini Roommates und ig si mit em Bus Richtig Grouse Grind ufbroche, wöu mir mit sibe angere Studänte e Wanderig uf e Grouse Mountain z Nord Vancouver plant hei. Für dä Wäg hei mer vier Busse müesse näh und si gueti 2h ungerwägs gse. Bevor mer losgloffe si, hei mir im Starbucks no es Kafi trunke. Verträte gsi höt si Mexiko, Kolumbie, Thailand, Brasilie, Portugal – und natürlech d Schwiiz.

Was mer schnäu gmerkt hei: Mir si vöu z weni warm agleit gsi und hei die fausche Chleider agleit. Am Morge isch es nämlech nume öppe 9 Grad gsi und mer hei de ganz Tag ziemlich gfrore. Während dr Wanderig hani de no drü Schwizerinne troffe, wo us em Kanton Luzärn cho si.

Dobe acho hei mer üs no d Lumberjack Show agluegt, bevor mer uf em Panoramawäg witergloffe si. Ungerwägs hei mer immer wieder über d Bäre gwitzlet. Uf dr Infotafele isch gstange, dass dr gröschti Bär – dr Polarbär – bis zu 2,90 Meter gross cha wärde, während dr chlinschti, dr Schwarzbär, öppe 1,80 Meter misst. Z Vancouver hets vorauem d Grinder- und d Coola-Bäre - e Art Grizzly Bär, wo zwüsche 2,10Meter und 2,4Meter wärde. Und tatsächlich hei mer när ou no e Grizzlybär gseh.

Gäge 19:00h si mer de wieder Deheim gse. Zwar e chli düregfrore, aber absolut zfriede mit emne coole Tag, wo mer zäme erläbt hei.

Tag 14: Gmüetlich

Schueu, Shoppe, Pizza ässe und Obespaziergang mit mine Roommates - das wär ou scho Tag 14 gse.

Tag 13: Doughnuts

Ä Doughnut und es Kafi nach dr Schueu isch scho fasch zur Gwonheit worde – u wenn me kei Zyt het, de git’s sicher es Kafi „Americano“ to go. D Doughnut-Läde het’s überau, u s Luschtigschte isch, dass sogar im Spitau so ne Lade ibout isch.

Z Problem bede berühmte Doughnutläde: Meischtens ab 14:00h oder ou scho früecher si die Läde läär – auso komplett usverchouft...

Tag 12: SkyTrain-Alltag

Mi normau Schueutag fangt meischtens am 7ni a, wenni dr Bus zum SkyTrain nime. Für Bus u Zug bruucht me hie e eigeti Charte, wo me immer wider muess uflade mit Gäud. Bevor me zum Gleis chunnt, muess me dür Schranke (ou nachem Usstige vom Zug passiert me wederum die Schranke mit der Charte). Dr SkyTrain louft automatisch, drum hets ou kei Zugfahrer und keini Kontrolleure.

S Problem isch jetzt aber eso : Vor de Schranke warte oft Obdachlosi, wo hoffe, dass öpper ihne d Tür ufmacht. Mängisch chame z zwöit düre, mängisch muessi aber säuber no einisch drücke – u zahle so öpper angerem d Fahr. Am Afang hani dänkt, dass das eifach dumme Zuefau isch gse, aber mittlerwile ischs eifach nur no müehsam.

Ig ha ou scho mit de Securitas gredt. Die hei nume gseit, das sig es bekannts Problem u dr Staat sötti das löse.

Good to know

Z Abfallstystem Kanada: Isch extrem sträng. Es wird aus trennt und recyclet bis zum letschte Glas. Wenn me öppis fausch entsorgt und das gseh wird, cha das e Bues gä.
Werum Vancouver so vöu Obdachlosi het: Erschtens isch z Wätter sehr möud in Vancouver (im Winter blibts meischtens bi öppe 2 Grad, Minusgrad gits sehr säute). Eso läbt sichs natürlich besser uf dr Stross aus zum Bispöu z Toronto, wos im Winter bis zu -20 Grad cha wärde. Zwöitens isch Vancouver riich - Sozialhilf wird zahlt und es git sogar viu Orte und Hüser, wo Obdachlosi chöi apeile.
Gsundheitssystem / Husärzt: Husarztpraxene gits fasch keini meh, d Spitäler si überfüllt. Ärzt und Pflegepersonau si extrem gsuecht. Wenn es Problem hesch und ufe Notfau geisch, de muesch mit 8h Wartezyt rächne, bis e Doktor gsesch. Zudäm wachts Vancouver extrem schnäu, überau wird bout, immer wie meh Lüt zieh id Stadt - z Gsundheitssystem ma nüm hingernoche und aus schnäui Medizin wird wiederum zur Droge griffe. Sisch auso ei Tüfuskreis, wo immer schlimmer wird.

Tag 11: Wenn "mild" immer no scharf isch

Wöu ig no nie indisch gässe ha, hani hüt Premiere gha. Camille und ig si i eis vode berüehmtischte Restaurant z Downtown gange und hei dört – für me – z'beschte Znacht gha sit ig hie z Vancouver bi.

Ig ha zwar no äxtra gseit, dass igs nid z'scharf wett ha. Aber offebar heisst "mild" bi de Inder öppis angers aus bi mir…

Tag 10: "Raincouver"

Scho fasch e typische Wintertag ischs höt gse: Vöu Luft, dr Räge wo sitwärts chunt und nur 14 Grad- typisch "Raincouver" haut. Mini Klass besteit us 16 Schüelerinne und Schüeler - hüt hei sech aber grad mou 7 dervo ir Schueu zeigt. Dr Räge isch für die angere e gnue grossi Motivation gse, lieber deheim z blibe - u das isch tatsächlich ou e ziemlich bekannte Grund wini höt verno ha. So isch ou scho Tag 10 verbi.

Tag 9: Busfahre

Da mini Gaschtfamilie kei Luscht het, üs d Stadt chli gnauer cho z zeige, und mini Roommates am Sunntig lieber Netflix und Schlof vorzieh, bini höt allei uf d Pischte. Ig bi mit em Bus zur Burnaby Mountain Conservation Area gfahre und ha dört e Rundwanderig vo öppe 15 km gmacht.

Wöu mis Handy när kei Akku meh gha het (isch mer no nie passiert) und ig mit em Bus hei ha müesse, isch dr Heiwäg chli komplizierter worde aus plant: Ig bi i fausch Bus igstige, wo während dr Fahrt no d Linie gwächslet het, und bi plötzlich am ne Bahnhof glandet, woni no nie gsi bi.

Mit der Höuf vo angere Lüt hani zwar wider Richtig heizue gfunge, bi aber när are Station oberhaub mim Wohnhus usgstige, woni logischerwis ou no nie gse bi (für aui Aktivitäte und em Schueuwäg geit me immer ungerem Wohnhus furt). Ohni Google Maps när das Wohnhus z finge, isch no so schwierig gse. Schlussändlich wär die Station vom Wohnhus nur 7 Minute entfärnt gse - ig hami aber e gueti Stung schwär do i däm Quartier.

Mis Fazit isch so: D Wanderig wär eigentlech schön gsi – aber elei mach ig das sicher nie meh :)

Tag 8: Deer Lake

Burnaby isch sehr hügelig und het unger angerem ou eine vode bekannteschte Seene - dr Deer Lake, wo z'miz ir Stadt ligt. So isch mit Kafi, lehre und spaziere ou scho dr Tag 8 verbi gange.

Tag 7: Outlet-Wahnsinn

Nach ere Wuche Bus und SkyTrain fahre chumi de langsam ou drus, wie aues funktioniert. Trotzdem hani scho es paar Mou de fausch Bus gno und bi zwöi Mou die Wuche z spät id Schueu cho. I söttige Situatione hani aube a mire Mitbewohnerin us Kolumbie aglüte.

U glich bini froh, muessi ned für immer jede Tag i dä SkyTrain - es wird mer nämlich immer schlächt. Vor auem am Morge früeh am 7ni, wenn me Rügge a Rügge steit oder de Bus vou isch und scho aui mögliche Gschmäcker id Nase bechunt … (sisch schochli grusig mängisch)

Nach der Schueu geits nie diräkt hei: Meischtens gits zersch e Wanderig dür d Stadt mit Kafi und Fast Food. Nachdäm hei mer dr Outlet bsuecht, wöu grad nöii Chleider si cho. Für dä simer zersch 1h 10min agstange für ine… Sisch du när ou ned es normaus Outlet gse - eher ä riesigi Lagerhaue mit Chleider für rund 10 Dollar z Stück. D Lüüt hei sech benoh wie Geier, eifach nume chli wüeschter.

Tag 6: Schoggi zieht

Das isch dr Diesel. Eigentlich ischs ihm gar nid erlaubt, zu üs id Wohnig abe z cho – är wohnt im zwöite Stock bi sire Gaschtfamilie, mir vieri im erschte. Aber wenn är am 9ni sini letschti Pippi-Rundi macht, chunnt är trotzdem fascht immer no churz bi mim Zimmer verbi. Schwizer Militärchrömli heter ömu gärn...:)

Good to know

Bus fahre = nüt vo schwarzfahre
Du chasch nur vorne bim Chauffeur istige und muesch diräkt mit dire Bus-Charte ichecke. Und wenn de Bus verlosch, seisch gfäuigscht no es höflichs „Thank you“ – macht hie würkli jede eso.
Cannabis als Medizin: Wöus hie so vöu Lüt het, wo medizinischi Höuf bruche, isch der Cannabis so gäbig erhäutlich. Die hei nämlich quasi es Rezäpt - für zuegängliche Canabis. Und die wo keis Rezäpt hei, die chöme glich zum Canabis.
Früsches Brot? Fehlazeige.
Es git zwar mega vöu Cafés und süessi Gepäck, aber eifach schnäu i Beck es früsches Brot go hole chasch hie ned. Me chouft eher Toast uf Vorrat und frürt dä ii – passt jo, wöu hie praktisch jede Tag Toast gässe wird (Zmorge, Zmittag und Znacht....)

Tag 5: Good life

Chli id Schueu go vo 08:30h bis 13:00h, no meh Nummere ustusche, denn go Käfele, chli sightseeing und gmüetlich go Znacht ässe. Kei Stress, eifach chli good life - und das wär ou scho Tag 5 gse.

Tag 4: Nummere ustuscht bis nach Sydney

Der erscht Schueutag: Wenn me würkli mou ganz vöu Natione uf eim Hufe wott träffe, de muess me definitiv ad ILAC-Schueu z Vancouver. Vo dene Schuele gits i ganz Canada nur zwöi – eini z Vancouver und eini z Toronto.

Was mer höt ufgfaue isch: Es schiint, aus wär d’Schwiz aus Heimatland e chli es Bonus-Feature. Uf jede Fau hani mit de Chinessinne schnöuer Nummere usduscht, ausi mi Laptop überhoupt ufe Tisch gleit ha.

Mis Kanada Abendtür: Tag für Tag

Hie chasch mini Reis dür Kanada mitverfolge, woni immer weder Updates wirde teile. Vöu Spass bem Läse:)

Tag 3: Uf Shoppingtour...

Ichoufe z Kanada isch e eigete Extremsport ... Nur z Chipsregau isch meh aus 10 Meter lang:) Mer hei schlussändlich nur wägem Mall 22'000 Schritte gmacht.

Good to know

Vancouver isch extrem multikulturell. „Typisch kanadisch“ gits fasch nid. Die meischte Lüüt hei Wurzle us Indie, China, de Philippine oder Lateinamerika.
Trotz au em Luxus het Vancouver es grosses Problem mit Obdachlosigkeit. Vor auem im bekannte „Downtown Eastside“ gseht me vöu Armuet und Drogesucht.
Cannabis isch hie legau und dementsprächend gseht me überau Läde, wo Marihuana und Cannabisprodukt verchouft wärde.
Die berühmte gäube Schueubüs transportiere nid eifach aui Ching. Teilwis wärde dermit speziell Ching gfahre, wo no z jung si für alleini id Schueu z go , wo beiträchtigt si oder schüsch e bsonderi Betröiig bruche.

Tag 2: Zwüsche Strandfeeling und Kulturschock

Mi erscht Tag hie z Burnaby het grad agfange wie e Netflix-Serie: I wohne jetz mit drü Mitbewohnerinne zäme – und scho das allei isch e chli e Wäultreis für sich. Die Öutischt isch 30gi und chunnt us Frankrich, eini us Kolumbie isch 23gi und denn hets no e 18-jährigi us Mexiko. Mir vieri teile üs e Wohnig und gö aui uf die glich Schueu - eifach im ne ungerschiedliche Pensum je nach Niveau. Diräkt ober üs wohnt üsi Gaschtfamilie.

Die hötigi Besichtigungstour z Vancouver het mit em Bus zum SkyTrain agfange. Mit der schwäbende SkyTrain het me die perfekti Ussicht gha uf d Hochhüser und glichzytig d Bärge im Hingergrund chönne aluege. Üse erscht Ort wo mer erkundet hei isch dr Canada Place gse. Das isch eine vo de bekanntischte Orte z Vancouver. Diräkt am Wasser lige vöu Krüzfahrtschiff, wo bau meh usgseh wie schwümmendi Hotels. Ou a däm Ort fahrt de berühmti Seabus ab. Das isch e Fähre, wo Vancouver mit North Vancouver verbindet. Für die Iheimische isches e normali Pändlerfähre - für üs Touriste aber eher wie e chlini Haferundfahrt mit Skyline-Ussicht.

Nach em Canada Place si mer düre Stanley Park glüffe. Dr Wäg het üs bis zum English Bay gfüehrt – und dört isch s Strandfeeling komplett ufcho... so hei mer de üse Tag ou lo usklinge.

Canada Place, Stanley Park, English Bay, Downtown Vancouver

Tag 1: D'Reis und d'Akunft

Am Samschtig Morge um 9:00h isch mini Reis nach Kanada losgange. Mi erscht Flug het zwar einige Turbulänze gha – glich simer pünktlich z Toronto acho. Dass es äng chönt wärde ber Zoukontroue z Toronto hani scho dänkt, aber dassi no ufs Büro muess hätti de würkli ned erwartet. Uf jede Fau bini när nach ca. 15h Flug insgsamt z Vancouver acho – bini schono froh gse.

Glandet bini dört am Obe um 20:39h Ortszyt. Und nachere witere Stung Outofahrt bini när ber Gaschtfamilie acho. Wöui no so lang mit der Gaschfamilie gredet ha, bini Ortszyt ersch 2:00h is Bett – für mi Körper ischs aber denn scho 11:00h am Mittag vom nöchschte Tag gse. Ha auso scho bau weder Hunger gha …